शोध

मी परत परत त्या देवळाच्या पायथ्याशी जातो

आणि कोरड्या नजरेने विराणे पाहतो



त्या रस्त्याला बहुतेक नजर लागली कुणाचि तरी

तू गेल्यावर तू नसल्याची अफवा पसरली

आता तिथे फारशी वर्दळ नाही

इतकी वाहने सरली त्यावरुन

की आता रस्त्यालाही सूरकुत्या पडल्या आहेत

पण मी परत परत त्या देवळाच्या पायथ्याशी जातो

आणि खडड्यांवर साचलेल्या धुळित तुझी पावले हुडकतो



खूप महिने झाले तुझे घर पडून

आता त्याच्या भिंतीच्या आठवणीही धूसर झाल्या आहेत

पण तुझी ती मूर्ती डोळ्यात अजुन साचून आहे

कमरेवर हात ठेवून हळूच गालात हसणारी

मजा यायची ना तुला ??

रांग लागायची जेव्हा तुला बघायला



अजूनही मी परत परत त्या देवळाच्या पायथ्याशी जातो

आणि ती पडकि भिंत हुडकतो

कदाचित तू दिसशील कुठल्यातरी भिंतीच्या पल्याड



आता एकटाच असतो मी तेथे

लोक म्हणतात त्यानी तुला वेशिपलिकडे पाहिलय

तिथे आता तुझे नवीन घर आहे म्हणे

छोटसच .. पण जरा महाग आहे म्हणे

तो भाग जरा शहरापासून जवळ आहे ना

पण मला अजुन खात्री आहे की तू इथेच आहेस

मी जिथे बोलावेन तिथे तू असशील



म्हणूनच मी परत परत त्या देवळाच्या पायथ्याशी जातो

आणि हाक मारतो "विठ्ठला !!.. आहेस का रे"

"देऊळ सोडून गेलास .. पण माणसाच्या आतून गेला नाहीस ना"